Hvernig skrifa ég kynningarbréf?
Kynningarbréfið er tækifæri þitt til að segja af hverju einmitt þú.
5 mín lestur
Til hvers er kynningarbréf?
Kynningarbréf (eða umsóknarbréf) fylgir ferilskránni og útskýrir í stuttu máli af hverju þú sækir um starfið og hvað þú hefur fram að færa. Á meðan ferilskráin telur upp staðreyndir, gefur bréfið þér rödd og persónuleika.
Gott kynningarbréf er stutt, oftast þrjár til fjórar málsgreinar, og sniðið að tilteknu starfi og fyrirtæki.
Uppbygging sem virkar
Byrjaðu á að nefna starfið sem þú sækir um og af hverju það vekur áhuga þinn. Í miðhlutanum tengir þú reynslu þína og hæfni við þarfir fyrirtækisins, með einu til tveimur áþreifanlegum dæmum. Í lokin þakkar þú fyrir og lýsir áhuga á viðtali.
Forðastu að endurtaka ferilskrána orðrétt. Notaðu bréfið til að segja sögu sem ferilskráin nær ekki að segja.